പരമ്പര സിനിമകള്‍

          പേര് കേള്‍ക്കുമ്പോളെ എന്തോ വശപിശക് തോന്നുന്നുണ്ടോ? ഒരു പേരില്‍ എല്ലാ സിനിമ പല ഭാഗങ്ങള്‍ ആയി എടുക്കുന്നതിനെ ആണ് പരമ്പര സിനിമകള്‍ എന്ന് പറയുന്നത്. ടെര്‍മിനെറ്റര്‍, റാമ്പോ, റോക്കി എന്നിവയെല്ലാം വളരെ അധികം വിജയങ്ങള്‍ കൊയ്ത സിനിമകള്‍ ആണ്.നാലും അഞ്ചും ഭാഗങ്ങള്‍ ആയി ആയിരുന്നു ഇവ. ഒരു ചിത്രം എവിടെ തീരുന്നോ, അതിന്‍റെ കണ്ടിന്യുവേഷന്‍ ആയി അടുത്തത് തുടങ്ങുന്നു.

          2011  എന്ന ഈ കൊല്ലം, ഇതുപോലെ ഉള്ള പരമ്പര സിനിമാകളുടെതാണ്.ഈ വര്‍ഷം പുറത്തുവരാന്‍ ഉള്ള പരമ്പരകള്‍ ഇവയൊക്കെ ആണ്.

1 ) ഫാസ്റ്റ് ആന്‍ഡ്‌ ദി ഫ്യൂറിയസ്-5.

          ഇത് മെയ്‌ ആദ്യവാരം തന്നെ പുറത്തിറങ്ങിയിരുന്നു. ഇത് വരെ ഇറങ്ങിയ 4 ഭാഗങ്ങളെക്കള്‍ തകര്‍പ്പനായി ഓടുകയും ചെയ്യുന്നു. കഴിഞ്ഞ നാല് ഭാഗങ്ങളിലും കാര്‍ റേസ് ആയിരുന്നു മേമ്പൊടി എങ്കില്‍ ഈ പ്രാവശ്യം വെടിവെപ്പും തല്ലുമോല്ലെയാണ് താരം. വിന്‍ ഡീസല്‍,പോള്‍ വോക്കര്‍, ദി റോക്ക് എന്നിവര്‍ തങ്ങളുടെ ഭാഗം നന്നായി അവതരിപ്പിച്ചിരിക്കുന്നു. ചുരുക്കിപ്പറഞ്ഞാല്‍ ഒന്ന് കാണേണ്ടത് തന്നെ ആണ് ഈ പടം.

2) എക്സ്- മെന്‍ ഫസ്റ്റ് ക്ലാസ്സ്‌.

          എക്സ് മെന്‍ ശ്രേണിയിലെ പുതിയ പടം ജൂണ്‍ 3 ഇന് തീയേറ്ററുകളില്‍ എത്തും എന്നാണു കരുതുന്നത്. ഫസ്റ്റ് ക്ലാസ്സ്‌ എന്ന പേരില്‍ ഇപ്പോളാണ് ഇറങ്ങുന്നതെങ്കിലും ഇത് ശെരിക്കും ബാക്കി ഉള്ള പടങ്ങളിടെ മുന്‍പേ ഉള്ളതാണ്. പ്രോഫെസ്സര്‍ സേവ്യറുടെയും  മാഗ്നറ്റോയുടെയും ചെറുപ്പകാലം ആണ് ഇതിന്റെ ഇതിവൃത്തം. അടുത്ത കൂട്ടുകാര്‍ ആയിരുന്ന അവര്‍ എങ്ങനെ ശത്രുക്കളായി എന്നും ഈ സിനിമ പറയുന്നു.

3) കുങ്ങ്ഫു പാണ്ട-2.

          കാണികളെ കുങ്ങ്ഫുവും നര്‍മവും കൂട്ടിയിണക്കി രസിപ്പിച്ച ഒരു അനിമേഷന്‍ ചിത്രം ആരുന്നു കുങ്ങ്ഫു പാണ്ട-1. ഡ്രാഗന്‍ സ്ക്രോള്‍ രക്ഷിക്കാന്‍ അബദ്ധത്തില്‍ ചുമതലയെല്‍പ്പിക്കപ്പെടുന്ന തടിയന്‍ പാണ്ടയുടെ കഥയാണ് ഇതിവൃത്തം. പുതിയ പടത്തില്‍ പാണ്ടയും കുങ്ങ്ഫു ഗുരുക്കന്‍മാരും കൂടെ ചൈനയില്‍ പോകുന്നു.ഇതിനു ശേഷം ഉണ്ടാകുന്ന അടിതടകളും നര്‍മവും ആണ് കാണേണ്ടത്. മെയ്‌ 26 ഇനു ബിഗ്‌ സ്ക്രീനില്‍ ഈ സിനിമ റിലീസ് ആകും.

4) ഹാരി പോട്ടര്‍ ആന്‍ഡ്‌  ഡെത്ത് ലി ഹാല്ലോസ്-2

          ജെ. കെ. റൌളിംഗ് എന്ന കഥാകൃത്തിന്‍റെ അനശ്വരമായ പോട്ടര്‍ കഥകളിലെ അവസാന ബുക്കിന്‍റെ രണ്ടാം ഭാഗം ആണ് ഈ സിനിമ. ഈ സിനിമയുടെ ആദ്യ ഭാഗം കഴിഞ്ഞ കൊല്ലം റിലീസായിരുന്നു. ദുഷ്ടനായ വോല്‍ടെമോര്‍ട്ടിനെ ഹാരി കൊല്ലുന്നതാണ് കഥ. പോട്ടര്‍ ശ്രേണിയിലെ അവസാന സിനിമ ആയിരിക്കും ഇത്.മുന്‍പ്‌ റിലീസായ 7 സിനിമകളും പോലെ ഇതും ബോക്സ്‌ ഓഫീസ് ഹിറ്റ്‌ ആകാനാണ് ചാന്‍സ്.ജൂലൈ 15നു ആണ് പടം തീയേറ്ററുകളില്‍  എത്തുന്നത്‌.

5)  ട്വിലൈറ്റ്- ബ്രേക്കിംഗ് ഡോണ്‍-1

          ഒരു രക്തരക്ഷസ്സും മനുഷ്യനും തമ്മിലുള്ള പ്രണയമാണ് ഈ സിനിമയുടെ കഥ.  എഡ്വേര്‍ഡ് എന്ന രക്ഷസ്സ് ബെല്ല എന്ന യുവതിയുമായി പ്രണയത്തിലാകുന്നു, അവരുടെ കല്യാണം, റെനെസ്മി എന്ന കുട്ടിയുടെ ജനനം. വോള്‍ട്യുരി എന്ന രക്ഷസ് നേതാക്കളുമായി ഉണ്ടാക്കുന്ന സംഘടനം ഒക്കെയാണ് ഈ സിനിമയില്‍ ഉള്ളത്. നവംബര്‍ 11 ആണ് റിലീസ് ചെയ്യാന്‍ ഉദ്ദേശിക്കുന്ന ദിവസം.

          ഇത് കൂടാതെ അവതാര്‍-2 , മിഷന്‍ ഇമ്പോസ്സിബിള്‍-4 , പൈറെട്ട്സ് ഓഫ് കരീബിയന്‍-4 ,അണ്ടര്‍വേള്‍ഡ് -4  എന്നിവയും ഉടനെ പ്രദര്‍ശനത്തിന്  എത്തും. എന്തായാലും ഹോളിവുഡ്  സിനിമ പ്രാന്തന്മാരുടെ കാലം. ഞങ്ങള്‍ ഭൂതങ്ങളും ഈ കാലയളവില്‍ ഒന്ന് എന്ജോയ്‌ ചെയ്യാന്‍ തീരുമാനിച്ചു..ഹുറേ.....

 

ഐ.പി.എല്‍ ബ്ലോഗ്‌ വിവാദം 2011

            ഐ.പി.എല്‍ എപ്പോളൊക്കെ നടന്നിട്ടുണ്ടോ അപ്പോളൊക്കെ വിവാദങ്ങളും ഉണ്ടായിട്ടുണ്ട്. ചുരുക്കിപ്പറഞ്ഞാല്‍ നാല് കൊല്ലമായി വിവാദങ്ങള്‍ നമ്മള്‍ കാണാറുണ്ട് കേള്‍ക്കാറുണ്ട്. ആദ്യം ലേലം മാറ്റി വെച്ചും, കൂടുതല്‍ തുക പിടിച്ചു വാങ്ങിയും ഒക്കെ ലളിത് മോഡി നിറഞ്ഞു നിന്നു. അതിനു ശേഷം ആണ് "ദി ഫെയിക്ക് ഐ.പി.എല്‍ പ്ലയെര്‍" എന്ന ഒരു കുണാണ്ടര്‍ ബ്ലോഗ്‌ എഴുതി വിവാദങ്ങളുടെ തൃശൂര്‍ പൂരം കൊണ്ടാടിയത്. ആ കുണാണ്ടര്‍ ഗാംഗുലി ആണ്, അല്ല കൊല്‍ക്കത്തയുടെ വേറെയേതോ കളിക്കാരന്‍ ആണ് എന്നൊക്കെ കേട്ടു.

          എന്തൊക്കെയായാലും പത്രം വായിക്കാത്ത മലയാളി ദിവസവും വൈകിട്ടു കണ്ണില്‍ എണ്ണയും ഒഴിച്ച് മേല്പറഞ്ഞ ബ്ലോഗ്‌ നോക്കിയിരിക്കുമായിരുന്നു. കൊല്‍ക്കത്തയുടെ മണ്ടക്കടിച്ച് രസിച്ച കുണാണ്ടര്‍ ഒളിപ്പോരു തുടര്‍ന്നു പോന്നു. കഴിഞ്ഞ ഐ.പി.എല്‍ സീസണില്‍ കുണാണ്ടര്‍ ഒന്നും എഴുതിപ്പിടിപ്പിച്ചുമില്ല ആയതിനാല്‍  മലയാളികള്‍ക്ക് വായിക്കാന്‍ ഉള്ള താല്‍പര്യവും കുറവായിരുന്നു. ഒടുവില്‍ താന്‍ ഒരു ഡോക്ടര്‍ ആണ്, എഴുതിയതിലോന്നും ഒരു സത്യവും ഇല്ല, എല്ലാം ഒരു നാടകം  ആണ് എന്ന് പറഞ്ഞു കുണാണ്ടര്‍ കൈ കഴുകി സ്ഥലംവിട്ടു. മലയാളികള്‍ ആകെട്ടെ ഇളിഭ്യരായി, തലേല്‍ മുണ്ടുമിട്ട് നടന്നു.എന്നാല്‍ എല്ലാ മലയാളി മുണ്ടന്‍ ചേട്ടന്മാര്‍ക്കും മുണ്ടി ചേച്ചിമാര്‍ക്കും ഒരു സന്തോഷ വാര്‍ത്ത‍, നിങ്ങള്‍ക്കായി പുതിയൊരു  ബ്ലോഗ്‌ വന്നിട്ടുണ്ട്.

ഈ ബ്ലോഗ്‌ ഗബ്രിയേല പാസ്ക്വാലോട്ടോ എന്ന കുണാണ്ടറിയുടേതാണ്.

മൂപ്പത്തി ചെറിയ പുള്ളി ഒന്നുമല്ല, തുള്ളല്‍ പ്രസ്ഥാനത്തിന്‍റെ ഉന്നമനത്തിനായി  ദക്ഷിണ ആഫ്രിക്കയില്‍  നിന്നു പ്രത്യേകമായി ഇറക്കുമതി ചെയ്താണ് മൂപ്പത്തിയെ.മുംബൈക്ക് വേണ്ടി  തുള്ളി മടുത്തപ്പോള്‍ മൂപ്പത്തിയാര്  നിശാ ക്ലബ്ബുകളെ കുറിച്ച് ഒന്ന് ബ്ലോഗ്ഗി. അത് ഒരു പുലിവാലാകും എന്ന് അവര്‍ പോലും വിചാരിച്ചു കാണത്തില്ല.

           എന്തായാലും  ഇപ്പോള്‍ ചേച്ചിടെ ബ്ലോഗ്‌ വന്‍ ഹിറ്റ്‌ ആയി കഴിഞ്ഞു. ചേച്ചി ബ്ലോഗ്ഗില്‍ എഴുതിയേക്കുന്നത് പകല്‍ മാന്യന്മാരായ  ക്രിക്കറ്റ്‌ കളിക്കാരുടെ നിശാ ക്ലബ്ബിലെ നല്ല നടപ്പിനെക്കുറിച്ചു ആണ്.ഇനി ചേച്ചിടെ ഭാഷേല്‍ തന്നെ ഞാന്‍ കാര്യം പറയാം. സ്വല്‍പം തുണ്ടൊക്കെ ഉണ്ട് ഇതില്‍.മാന്യ വായനക്കാര്‍ ഈ ഭൂതത്തിനോട് ക്ഷമിക്കണം.

           ഇന്ത്യയിലെ ആള്‍ക്കാര്‍ക്ക് ഞങ്ങള്‍ (ചീയര്‍ ലീഡേര്‍സ്) നടക്കുന്ന തുണ്ട് നായികമാരെ പോലെയാണ്. എവിടെ പോയാലും എല്ലാ കണ്ണുകളും  ഞങ്ങളുടെ മേലെയായിരിക്കും. പെണ്ണുങ്ങള്‍ രണ്ടാവര്‍ത്തി നോക്കും എന്നിട്ട് ഞങ്ങള്‍ അവരുടെ മുന്നില്‍ ഇല്ലാത്തപോലെ നടക്കും (അത് ഇന്ത്യന്‍ പെണ്ണുങ്ങളുടെ അസൂയ മൂലം ആണെന്ന് ഈ ഭൂതത്തിന് പറയാന്‍ പറ്റും). ആണുങ്ങളാണേല്‍ ആദ്യം മുഖത്ത് നോക്കും, പിന്നെ മാറിടങ്ങളിലേക്ക് അവിടുന്ന് നിതംബങ്ങളില്‍, ഒടുക്കം ഈ നോട്ടം മാറിടങ്ങളില്‍ തന്നെ വന്നു നില്‍ക്കും.

           എല്ലാ കളികള്‍ക്ക് ശേഷവും നിശാ ക്ലബ്ബുകളില്‍ ആഘോഷം ഉണ്ടായിരിക്കും. അവിടെ പാട്ടും,കൂത്തും, മദ്യമൊഴുക്കും, അതിന്‍റെ ഇടക്ക് വന്നും പോയുമിരിക്കുന്ന കളിക്കാരും കാണും. ആ കൂട്ടത്തില്‍ ധോണിയും, രോഹിത് ശര്‍മയും ആണ് ഡീസെന്‍റ് ആള്‍ക്കാര്‍, ഏതേലും ഒരു മൂലക്ക് പോയി അവര്‍ ഒതുങ്ങി കൂടിക്കോളും. സച്ചിന്‍ ആണേല്‍ ക്ലബ്ബിന്‍റെ അടുത്ത് പോലും വരാറില്ല,അത്രക്ക് മാന്യന്‍. എന്നാല്‍ ജോണ്ടി റോഡ്സും, ആല്‍ബീ മോര്‍ക്കെലും ഉടായിപ്പുകാരാണ്. ഗ്രഹാം സ്മിത്ത് ആണെങ്കില്‍ സ്വന്തം കാമുകി കൂടെ ഉണ്ടായിരുന്നിട്ടും കണ്ട പെണ്‍പിള്ളേരുടെ  പിന്നാലെ കൊഞ്ചി നടക്കുകയാണ്.കംഗാരുക്കള്‍ രസികന്മാരാണ് കൂടാതെ കുരുത്തം കെട്ടവന്മാരും.പിന്നെ ചിലര്‍ പെണ്ണുങ്ങളുടെ അടുത്ത് നേരിട്ട് പറയുന്നു- എന്‍റെ കൂടെ വീട്ടില്‍ വാ നീ നമുക്ക് കിടക്ക പങ്കിടാം.

           എന്‍റെ ദൈവമേ, ഞാന്‍ കണ്ടിട്ടുള്ളതില്‍ വെച്ച് സ്വല്‍പം പിരിവെട്ടുള്ളതും. കുരുത്തം കെട്ടവന്മാരും  ക്രിക്കറ്റ്‌ കളിക്കാര്‍ മാത്രമാണ്. പുറത്തുള്ള നാട്ടുകാരെക്കാള്‍ പേടിക്കേണ്ടത് ഈ പഹയന്മാരെ ആണ്. എനിക്ക് ഇനിയും കുറച്ചു കാലം കൂടെ ഇവിടെ കഴിയാന്‍ ഉള്ളതാണ്, അതുകൊണ്ട് ഇവന്മാരെ നല്ലപോലെ സൂക്ഷിച്ചാല്‍ എനിക്ക് കൊള്ളാം.

           ഇങ്ങനെ പോകുന്നു ഗബ്രിയെലയുടെ ബ്ലോഗ്‌. ഇത് കണ്ടാല്‍ ഐ.പി.എല്‍-ന്‍റെ തല-തോട്ടപ്പന്മാര്‍ ചുമ്മാതെ ഇരിക്കുമോ? അവന്മാര്‍ അങ്ങ് പ്രഖ്യാപിച്ചു- ഗബ്രിയേല മോളുടെ ആട്ടം പോര, സംഗതി പോര, മോളെ തീരെ മാര്‍ക്കെറ്റ് ചെയ്യാന്‍ പറ്റുന്നില്ല. അതുകൊണ്ട് മോള് വീട്ടില്‍ പോയിരുന്നാട്ടെ. അങ്ങനെ സത്യം മാത്രം വിളിച്ചു പറഞ്ഞ ഒരു സാധു പെങ്കൊച്ചിന്‍റെ  ജോലിയും പോയി.

           ഇതിനെതിരായി അഖില ലോക തുള്ളല്‍ പ്രസ്ഥാന സംഘടന നാളെ മുതല്‍ അനിശ്ചിത കാലത്തേക്ക് ഭാരത ബന്ദ്‌ പ്രഖ്യാപിച്ചു എന്ന് കേട്ടു. ഇനി ഐ.പി.എല്‍-ഇല്‍ ആരും തുള്ളരുത്, തുള്ളിയാല്‍ തുള്ളുന്നവന്‍റെ  മുട്ടുകാല്‍ തല്ലി ഓടിക്കും എന്നാണ് സംഘടനയുടെ ഭീഷണി. ഈ തുള്ളല്‍ ബന്ദ്‌ കളിക്കാര്‍ക്കും ബാധകം ആണ് എന്നാണ് സംഘടന പറയുന്നത്. ആയതിനാല്‍ കളിക്കിടയില്‍ വിക്കെറ്റ് വീണാലോ,ക്യാച്ച് എടുത്താലോ, ആരും തുള്ളാന്‍ പാടില്ല.

          ഈ ബന്ദ്‌ മലയാളികളുടെ തുള്ളല്‍ രോമാഞ്ചമായ ഗോപു മോനെ ഒതുക്കുവാന്‍ വേണ്ടി മാത്രം ആണ്, ഇതിനെതിരെ തുള്ളി തന്നെ പ്രതികരിക്കും എന്ന് ഗോപുമോന്‍ ഫാന്‍സ്‌ അസോസിയേഷന്‍ പ്രസിഡന്റ്  തുള്ളന്‍ തുളസി പത്ര സമ്മേളനം വിളിച്ചുകൂട്ടി അറിയിച്ചു. ഐ.പി.എല്‍-ഇല്‍ കൊച്ചിയുടെ ഇനിയുള്ള എല്ലാ കളികള്‍ക്കും ഒരു തുള്ളല്‍ ടീമിനെ അയക്കാനും തങ്ങള്‍ക്ക് പരിപാടിയുണ്ടെന്നും തുളസി പറഞ്ഞു. ഇതിനായുള്ള സ്പെഷ്യല്‍ റിക്രൂട്ട്മെന്‍റ് കൊച്ചിയിലുള്ള എല്ലാ ബിവറെജസുകളില്‍ നടക്കുമത്രെ.
 
          എന്തായാലും ഈ ഭൂതത്തിന് സംഗതികളുടെ കിടപ്പുവശം ഇഷ്ട്ടപെട്ടു. ഇനി വല്ല ബിവറെജസുകളില്‍ പോയി തുള്ളിയാലോ എന്നൊരു ആലോചന ഇല്ലാതില്ല, എങ്ങാനും റിക്രൂട്ട് ചെയ്തു കൊച്ചിയുടെ കളികള്‍ക്ക് തുള്ളാന്‍ കൊണ്ടുപോയെങ്കിലോ?
അങ്ങനെ ആണേല്‍ തുള്ളാതെ നിക്കുന്ന ചേച്ചിമാരേം കാണാം, കളിയും കാണാം....വാട്ട് ആന്‍ ഐഡിയാ ഭൂതം ജീ!!!!!!

അണ്‍സൈക്ലോപീഡിയ അഥവാ അണ്‍-സഹിക്ക്വോ-പീടിക

         ഇങ്ങനെ ഒരു പീടിയയെ കുറിച്ച് നിങ്ങള്‍ എത്ര പേര് കേട്ടിട്ടുണ്ട്? എന്തായാലും ഈ ഭൂതം ഇതിനെക്കുറിച്ച്‌ വായിച്ചറിഞ്ഞിട്ടുണ്ട്. ഓരോ സിനിമ നടന്മാര്‍ക്കും ഡ്യൂപ്പ് ഉള്ള പോലെ ഇവാനാണ്  നമ്മുടെ വിജ്ഞാനകോശമായ വിക്കിപീഡിയയുടെ ഡ്യൂപ്പ്. ഡ്യൂപ്പ് ആകുമ്പോള്‍ സീരിയസ് റോള്‍ ഒന്നും പറ്റില്ലല്ലോ, എല്ലാ ഡ്യൂപ്പിനേം പോലെ ഇവനും ഒരു തമാശക്കാരന്‍ ആണ്. വെറും തമാശ അല്ല, ആളുകളെ അടച്ചാക്ഷേപ്പിക്കുന്ന ചാക്യാര്‍കൂത്ത് പോലെ ആണ് നമ്മുടെ കക്ഷി.

          അണ്‍സൈക്ലോപെഡിയ എന്നാ പേര് തന്നെ എന്‍സൈക്ലോപീഡിയ എന്ന് പറയും പോലെ തന്നെ ഉണ്ട്. എന്നാല്‍ ഒരു ഡ്യൂപ്പും സാധാരണ ചെയ്യാത്ത ഒരു കാര്യം ഇവന്‍ ചെയ്തു കാണുന്നുണ്ട്- ഒറിജിനലിനെ നല്ല പച്ചക്ക് കളിയാക്കുക.

        ഇടയ്ക് വിക്കിപീടിയയുടെ സ്ഥാപകന്‍  ജിമ്മി വെയില്‍സ് കാശ് സ്വരുക്കൂട്ടനായി വിക്കിയില്‍ ഒരു പരസ്യം ഇട്ടരുന്നു, അതിനെ കളിയാക്കാനായി ഡ്യൂപ്പാശാന്‍ ജിമ്മി അണ്ണന്‍റെ  മോര്‍ഫ് ചെയ്ത അര്‍ത്ഥനഗ്നമായ പടം ആയിരുന്നു ഇട്ടത്. ജിമ്മി അണ്ണനെ കളിയാക്കാന്‍ മടിക്കാത്ത ഡ്യൂപ്പ് കേരളത്തെ പോലും വെറുതേ വിട്ടിട്ടില്ല.
കേരളത്തിന്‌ അവര്‍ നല്കിയേക്കുന്ന
മോട്ടോ -'ഹര്‍ത്താലിന്‍റെ  സ്വന്തം നാട് '
ദേശീയ ഗാനം -' മാനസ മൈനേ വരൂ'
ഇതൊന്നും പോരാതെ വംശനാശ ഭീഷണി നേരിടുന്ന സിംഹവാലന്‍ കുരങ്ങുകളും, കമ്മ്യുണിസ്റ്റുകളും കണ്ടു വരുന്ന സ്ഥലം ആണ് കേരളം എന്നും പഹയന്മാര്‍ എഴുതിപ്പിടിപ്പിച്ചിട്ടുണ്ട്. (ഈ ഒരു കാര്യത്തിലെങ്കിലും അവന്മാര്‍ സത്യം പറഞ്ഞല്ലോ).

        കേരളത്തിന്‍റെ ഉത്ഭവം ബഹുരസമാണ്. മിസ്റ്റര്‍.ശിവന്‍ എവറസ്റ്റ്‌  കൊടുമുടിയില്‍ വെച്ച് ലോക്കല്‍ ദേവഗണങ്ങള്‍ക്കായി  നടത്തിയ മഴുവേര്‍ മത്സരത്തില്‍ പരശുരാമന്‍ എന്നയാളുടെ മഴു ലക്‌ഷ്യം തെറ്റി അറബിക്കടലില്‍ വീണു. പെട്ടന്ന് അറബികടലില്‍ നിന്ന് കര പൊങ്ങി വന്നു. ഈ കരയാണത്രെ കേരളം. ( ഇതേ സമയത്ത് ഏതോ ദേവന്‍ അവിടെ ഇരുന്നു പാടിയ പാട്ടാണ് -
അറബിക്കടലിളകി വരുന്നേ, ആകാശ പോന്നു വരുന്നേ...
ആലോലം തിരകളിലെ അമ്മാന വഞ്ചിയിലെ
അരുമ പൊന്‍ മീനെ വാ പൊന്‍ മീനെ വാ വാ.
ഈ ദേവന്‍ പാട്ട് കുറിച്ച് വെച്ച ബുക്ക്‌ പില്‍കാലത്ത് തമ്പിയദ്ധേഹത്തിനു കിട്ടി,അദ്ദേഹം അതൊരു ഹിറ്റ്‌ ഗാനമാക്കുകയും ചെയ്തു )

          മലയാളികള്‍ അല്ലെങ്കില്‍ മല്ലുസ് എന്നാണ് കേരളക്കാര്‍ അറിയപ്പെടുന്നത്. ഇവരുടെ പേരിടലിനു ഒരു ഫോര്‍മുല ഉണ്ട്. അച്ചന്‍റെ പേരിന്‍റെ ആദ്യവും അമ്മയുടെ പേരിന്‍റെ അവസാനവും (അല്ലെങ്കില്‍ തിരിച്ചുമാകാം)  എടുത്താണ് കുട്ടിക്ക് പേരിടുന്നത്. അച്ഛന്റെ പേര് ജോണി എന്നും അമ്മേടെ പേര് ബീനാ എന്നും ആണെങ്കില്‍ മകന്‍റെ പേര് ജോബി എന്നും മകളായാല്‍‌ നാണി എന്നുമായിരിക്കും ഇടുക. ഇതിന്‍റെ കൂടെ തന്നെ മോന്‍ എന്നും, മോള്‍ എന്നും ചേര്‍ക്കുന്നത് ഒരു ട്രെന്‍ഡ് ആയിട്ടുണ്ട്. ജോബിമോന്‍, നാണിമോള്‍ എണ്ണ മാതിരിയൊക്കെ.

          എവിടെ പോയാലും മലയാളിയെ കണ്ടെത്താന്‍ ഒരു മാര്‍ഗമുണ്ട്- എവിടെ എങ്കിലും ഒരു ഉണ്ട എണ്ണ ഒഴുകി നടക്കുന്നത് കണ്ടാല്‍ അപ്പോള്‍ ഉറപ്പിച്ചോ അതൊരു മലയാളിടെ തല ആയിരിക്കും.
ഈ ഭൂതം എപ്പോളും ആലോചിക്കും വേറെ എന്തൊക്കെ വിദ്യകളുണ്ട് ഒരു മലയാളിയെ കണ്ടെത്താന്‍ എന്ന്.മല്ലുസ് സ്വര്‍ണച്ചാക്കുകളാണ്. ആണുങ്ങളുടെ കയ്യിലോ കഴുത്തിലോ തുടലിന്‍റെ കട്ടിയില്‍ സ്വര്‍ണം കൊണ്ടുള്ള ആഭരണം കാണും. ഇവയൊക്കെ ആണ് ഭാര്യമാര്‍ കണവന്മാരെ പിടിച്ച പിടിക്ക് നിര്‍ത്താന്‍ ഉപയോഗിക്കുന്നത്. പെണ്ണുങ്ങടെ കാര്യമാണേല്‍ പറയുകയും വേണ്ട, ഇവറ്റകള്‍ നെറ്റിപട്ടം കെട്ടിയ ഗജവീരന്മാരെ പോലെ ആണ്.ഒരു സ്വര്‍ണ നെറ്റിപ്പട്ടം കഴുത്ത് മുതല്‍ അര വരെ അണിഞ്ഞു ഇരിക്കും. കാലിലും കാണും ചങ്ങല പോലെ രണ്ടു പാദസരങ്ങള്‍. ഇത് കണവന്മാര്‍ ഭാര്യമാരെ കെട്ടിയിടാന്‍ ഉപയോഗിക്കുന്നതാണ്.വിലക്കൂടിയ മൊബൈല്‍ ഉണ്ടെങ്കില്‍ പ്രദര്‍ശിപ്പിച്ചു നടക്കുന്നതാണ് ഇവരുടെ വേറൊരു വിനോദം. അതും പോരാതെ കുട്ടികള്‍ എല്‍.കെ.ജി-യില്‍ എത്ര മാര്‍ക്ക്‌ മേടിച്ചു എന്ന് ഗീര്‍വാണം അടിക്കുന്നതും ഉണ്ട് വിനോദമായിട്ട്.

          .
നമ്മള്‍ ഡ്യൂപ്പിന്‍റെ  കഥ പറഞ്ഞല്ലേ ഇവിടം വരെ എത്തിയത്. ഡ്യൂപ്പാശാന്‍  കേരളത്തിനെ മാത്രമല്ല നാറ്റിക്കുന്നത്. ഒരു മാതിരി കടിച്ചാല്‍ തിരിച്ചു കടിക്കാത്ത എന്തിനേം ആശാന്‍ ഒരു ചൊറിഞ്ഞു വിടാറുണ്ട്.  ആശാന്‍ കേരളത്തിന്‍റെ ഹീറോയായി പറഞ്ഞേക്കുന്നത് ഗോഫു മോനെ ആണ്. അതുകൊണ്ട് ആശാനെ സൂക്ഷിച്ചോ, മല്ലുസ് ചാത്തന്‍സേവ നടത്തി ആശാനെ പണ്ടാരടക്കും.സൂക്ഷിച്ചാല്‍ ദുഖിക്കേണ്ട....ഒരു കാര്യമുണ്ട് ഈ എഴുതിയെക്കുന്നതെല്ലാം പരമ സത്യമാണ്. അത് ഈ ഭൂതത്തിന് നന്നേ ബോധിച്ചു.

അങ്ങനെ ലാദന്‍റെ യുഗം അവസാനിച്ചു

ലാദന്‍ എന്ന പേര് നമ്മള്‍ ആദ്യമായി കേള്‍ക്കുന്നത് ഒരു സെപ്റ്റംബര്‍ 11നു ആണ്. അമേരിക്കയുടെ അഭിമാന സ്തംഭമായ വേള്‍ഡ് ട്രേഡ് സെന്‍റര്‍ നാമവശേഷം ആക്കിയ ഭീകരന്‍ വേറാരുമല്ല ലാദന്‍ ആണെന്ന് എല്ലാ പത്രങ്ങളും പിറ്റേന്ന്എഴുതി. പാശ്ചാത്യര്‍ക്ക് അവന്‍ വെറുക്കപ്പെട്ടവന്‍ ആയപ്പോള്‍ ഒരു ജനതയ്ക്ക് പുണ്യാളന്‍ ആയിരുന്നു അവന്‍. ലാദനെ ഒരു ഭീകരന്‍ ആക്കിയത് ഇതേ അമേരിക്ക തന്നെ ആയിരുന്നു. സോവിയറ്റ്‌ യൂണിയന്‍-കാരുടെ അഫ്ഘാന്‍ അധിനിവേശത്തിനു തടയിടാന്‍ അമേരിക്ക കണ്ടെത്തിയ എളുപ്പ മാര്‍ഗമായിരുന്നു ലാദന്‍. ഇത്രയും കാര്യങ്ങള്‍ എല്ലാവര്‍ക്കും അറിയാവുന്നതാണ്. എന്നാല്‍ അമേരിക്കയും ലാദനും തമ്മില്‍ തെറ്റിപിരിയാന്‍ ഉള്ള കാരണം എന്തായിരുന്നു? അമേരിക്കക്കും  ലാദനും മാത്രം അറിയാവുന്ന ഒരു രഹസ്യം.

          നമ്മള്‍ അറിയുന്ന പോലെ അത്ര ഭീകരന്‍ ആണോ ഈ ലാദന്‍? ലോകരുടെ വല്യേട്ടനായ അമേരിക്ക ചെയ്തിട്ടില്ലേ ഇതിലും കൊടിയ ഭീകരവാദം? ലോകത്തുള്ള ത്രീവവാദികള്‍ കൊന്നൊടുക്കിയ കണക്കു നോക്കിയാല്‍ അമേരിക്ക നടത്തിയിട്ടുള്ള നരഹത്യയെക്കള്‍ എത്ര കുറവായിരിക്കും അത്? ഇത് കേട്ടാല്‍ നിങ്ങള്‍ വിചാരിക്കും ഈ ഭൂതം ഒരു തീവ്രവാദി ആണെന്ന്. അങ്ങനെ ആണെങ്കില്‍ എന്നെക്കാള്‍ വല്യ തീവ്രവാദി അല്ലെ ഈ അമേരിക്ക? ഞാന്‍ എപ്പോളും എവിടെയും നിഷ്പക്ഷന്‍ ആയിരിക്കും,എവിടെയും ആയുധം എടുക്കേണ്ട കാര്യവുമില്ല, മാന്ത്രിക വിദ്യ മാത്രം മതി ഇവന്മാരെ ഒക്കെ ഒതുക്കാന്‍. 

         ഇംഗ്ലീഷില്‍ ഒരു ചൊല്ലുണ്ട്, മലയാളത്തില്‍ വിവര്‍ത്തനം ചെയ്താല്‍ ഇങ്ങനെ ആണ് - 'ചരിത്രം രചിക്കുന്നത്‌ വിജയികളാണ്'.
മഹാഭാരതത്തില്‍ തന്നെ പറയുന്നുണ്ട് ദുര്യോധനന്‍ നല്ലൊരു ഭരണാധികാരി ആയിരുന്നു, പ്രജകളുടെ കണ്ണിലുണ്ണി  ആയിരുന്നു  എന്നൊക്കെ. ചരിത്രത്തില്‍ അയാളുടെ പേര് ദുര്യോധനന്‍ ആയതെങ്ങനെ? സുയോധനന്‍, സുശാസനന്‍, സുശള  എന്നിങ്ങനെ ആയിരുന്നു കൌരവരുടെ പേരുകള്‍. പാണ്ഡവര്‍ യുദ്ധം ചെയ്തു ജയിച്ചു, അതിനു ശേഷം സു എല്ലാം മാറി ദു ആയി. മഹാഭാരതം തന്നെ നോക്കുവാണേല്‍ പാണ്ടവരും കൌരവരും അന്യോന്യം ചതി നടത്തിയിട്ടുണ്ട്, എന്നിട്ടും കൌരവന്മാര്‍ ചതിയന്മാരും പാണ്ഡവര്‍ നല്ലവരും ആയി. കാലം അങ്ങനെ ആക്കി തീര്‍ത്തു.

          അമേരിക്കയുടെ കാര്യം തന്നെ എടുക്കാം. രണ്ടാം ലോകമഹായുദ്ധത്തിന്റെ ഒടുക്കം ഹിരോഷിമേലും നാഗസാക്കിയിലും അവര്‍ നടത്തിയ കൂട്ടക്കുരുതിക്ക് തുല്യം വെക്കാന്‍ വേറെ ആരെങ്കിലും ആരെയെങ്കിലും കൊന്നോടുക്കിയിട്ടുണ്ടോ? വിയെട്നാമില്‍ കേറി കളിച്ച അമേരിക്ക അവസാനം തോറ്റു മടങ്ങിയില്ലേ? ഒന്നും നടക്കാതെ വന്നപ്പോള്‍ എജന്റ്റ്‌   ഓറഞ്ച് എന്ന രാസവസ്തു തളിച്ച് അവിടുത്തെ പച്ചപ്പ്‌ എല്ലാം നശിപ്പിച്ചതും പോരാതെ യു.എന്‍ നിരോധിച്ച കാര്‍പെറ്റ് ബോംബിങ്ങും നടത്തി. വിയെട്നാമില്‍ നിന്ന് അമേരിക്കയിലേക്കുള്ള ശവപ്പെട്ടികളുടെ എണ്ണം കൂടിയപ്പോള്‍  അവസാനം സൈനികരെ തിരിച്ചു വിളിച്ചു.

          അതിനു ശേഷം താലിബാനെതിരെയുള്ള യുദ്ധം,അമേരിക്കയില്‍ വരെ ആള്‍ക്കാര്‍ പ്രതിക്ഷേധവുമായി  ഇറങ്ങിയ ഇറാഖ് യുദ്ധം അങ്ങനെ എണ്ണിയാല്‍ തീരാത്ത ക്രൂരതകള്‍ ചെയ്തിട്ടില്ലേ ഈ അമേരിക്ക? സദ്ദാം എന്ന ഭരണാധികാരി ലോകവിനാശത്തിനുള്ള ആയുധങ്ങള്‍ സ്വരുകൂട്ടി വെച്ചിട്ടുണ്ട് എന്നും പറഞ്ഞു ആയാളേം കൊന്നു കളഞ്ഞു. മിക്കവരും ഇപ്പോളും വിശ്വസിക്കുന്നത് സദ്ധാമിനെ  ആദ്യമേ അവര്‍ ജീവനോടെ പിടിച്ചു എന്നിട്ട് ആ രാജ്യത്തെ നശിപ്പിച്ചതിന് ശേഷം മാത്രമാണ് ലോകത്തിന്‍റെ മുന്നില്‍ അവതരിപ്പിച്ചത് എന്നാണ്. എന്ത് കൊണ്ട് അയാളെ യു.എന്‍ ഇന്‍റെ കീഴില്‍ വരുന്ന കോടിതിയില്‍ കൂടെ ശിക്ഷ വിധിച്ചില്ല? പരമാധികാരമുള്ള ഈ രാഷ്ട്രങ്ങളില്‍ ഒക്കെ കേറി തലയിടാന്‍ ഈ അമേരിക്ക ആരാ ലോകപോലീസോ.
 
          അമേരിക്കയും ലാദനും അന്യോന്യം കള്ളവെട്ടു നടത്തിയിട്ടുണ്ട്, അതിനാല്‍ ആണ് അവര്‍ തമ്മില്‍ തെറ്റാന്‍ ഉള്ള സാധ്യത ഉള്ളത്. ഞാന്‍ ഈ പറയുന്നത് ലാദനെ നീതീകരിക്കാന്‍  അല്ല, പക്ഷെ ലാദനെ കൊന്നു എന്ന് വീമ്പിളക്കുന്ന അമേരിക്കയെ എനിക്ക് നീതീകരിക്കാനും വയ്യ. ലാദന്‍റെ ആവശ്യം അമേരിക്കക് ഇപ്പോള്‍ ഇല്ല, അതിനാല്‍ അവര്‍ ലാദനെ തട്ടി.(ഇതിനും എത്രയോ മുന്‍പേ തന്നെ ലാദന്‍ ബോംബ്‌ സ്പോടനത്തിലും, കിഡ്നി തകരാറ് മൂലവും മരിച്ചിട്ടുണ്ട്, അത് പോലെ ആകാതിരുന്നാല്‍ കൊള്ളാം). എന്തായാലും ഒരു കാര്യം ഉറപ്പാണ്‌- ഇനിയും ഇത് പോലെ ലാദന്മാര്‍ ജനിക്കും, എന്നും അവര്‍ അമേരികയ്ക്ക് ഉപദ്രവവും ഉണ്ടാക്കും. ഇനിയും യുദ്ധങ്ങള്‍ താങ്ങാന്‍ ഈ ഭൂമിക്ക് കഴിയുകയില്ല, ഇനിയുമൊരു ലോകമഹായുദ്ധം നടന്നാല്‍ അതിനെ ശേഷം ഉള്ള യുദ്ധങ്ങള്‍ അമ്പും, വില്ലും, വാരിക്കുന്തങ്ങളും ഉപയോഗിച്ചായിരിക്കും, അത് ഉറപ്പാണ്‌ ഈ ഭൂതത്തിന്.